منوی ناوبری برگه ها

پورتال تحلیلی اجتماعی، فرهنگی، ادبی و سرگرمی شهر خوی به دو زبان ترکی و فارسی مطالب خود را منتشر می کند.

آذربایجان تاریخ و فولکلور آراشدیریجیسی «اوستاد پرویز یکانی زارع‌له» دانیشیق

آذربایجان تاریخ و فولکلور آراشدیریجیسی «اوستاد پرویز یکانی زارع‌له» دانیشیق

©اختصاصی سایت خوی کیدز : آذربایجان تاریخ و فولکلور آراشدیریجیسی «اوستاد پرویز یکانی زارع‌له» دانیشیق :

شمع اگر یانماسا یاشامیر دئمک — اونون یاشاماسی یانماقدادیر


“یازارین اثری کولتور گؤزگوسو اولمادادیر”

 

-       اوستاد ایلک اولاراق اؤزونوزو تانیدیریب، بویورون هارالاردا تحصیل آلیبسینیز؟

آدیم «پرویز»، سوی آدیم «یکانی زارع»، یازی آدیم «ائلیار». گونش ایلینین ۱۳۲۱ینده، آذر آیینین سون گونونون سون آنلاریندا (چیلله آخشامیندا)، مرند ویلایتی‌نین “یکانات” ماحالینی “نورآباد (شوغئییب)” کندینده بیر مالیک عاییله‌ده دونیایا گؤز آچمیشام. آتام «میرزه محمد علیخان» آذربایجان جمهوریتینده یوکسک تحصیل آلمیش، بوش دیله تام شکیلده مسلط‌ ایمیش و ۱۳۲۶دا تانری‌نین رحمتینه قووشموش. آنام «فاطما» خانیم، اردملی بیر قادین کیمی بوتون عؤمرونو و گنج‌لیگینی بیز دؤرد قارداش و بیر باجی‌نین اؤیرتیمینه وقف ائتمیش و نهایت ۳/۱۲/۱۳۶۵ده دونیاسین ده‌ییشدی.

من ایلک و اورتا مکتبلرینی خوی شهرینین فردوسی و شمس مدرسه‌لرینده بیتیردیم. ۱۳۴۲ده «سپاه دانش» عونوانیله خویون «زه‌روان» آدلی کندینده مشغول اولدوم. ائله بورادا کند اهلینین قارابختلیگینه و مینلرجه فلاکت و ایجتیماعی چیرکابلار ایچینده ذیللت‌له عؤمور سؤرمه‌لرینه شاهید اولاراق روحیه‌مده بؤیوک ده‌ییشیک‌لر اوز وئردیو میللتین جهالت و ساوادسیزلیغی خالق مصائبی‌نین تکجه و اساس سببی آندیم…

دورد نوشم، رندلر ته کاسه سین ایچمک ایشیم — ایندی آمما شیشه‌دن بیر صافی گؤزلر گؤزلریم

کفر زولفون شرحینی یازماقدا عاجیز قالمیشام — عقده‌ی مشکلدن، بیر کشافی گؤزلر گؤزلریم

راه مشکل، رهنما یوخ، خیضر غائب، من غریب — رحمی چوخ بیر صاحیب الطافی گؤزلر گؤزلریم. (عاریف سید ابولقاسم نباتی)

۱۳۴۶جی ایلده مکمل تحصیل آلماق اوچون تهرانین «ابوریحان بیرونی» بیلیم‌یوردونا گیریب و ۱۳۵۰ده یوکسک تحصیلی بیتیردیم. ائله هامان ایلدن خویون اورتا مکتبلرینده، پئداقوژی مرکزینده، علامه طباطبایی (ایندیکی پیام‌نور بیلیم‌یوردو)، هابئله آزاد ایسلامی بیلیم‌یوردوندا درس وئریب و ۱۳۷۳ده اؤیره‌تیم ایداره‌سیندن تقاعودچولوق شرفینه ناییل اولدوم، آنجاق ۱۳۸۰جی ایلده بیلیم‌یورددا تدریسه سون قویدوم. اوزاماندان گونو بو گونه قدر هر گون آزی ۱۰-۱۲ ساعات موطالیعه، تدقیق و آراشدیرما و یازی ایشلرینه واخت صرف ائده‌رم.

تقاعودا بوراخیلماقدان سونرا عؤهده‌لنمیش توپلومسال وظیفه‌لریمی بئله ایضاح ائده بیلرم:

۱-    خوی یازیچیلار درنگی‌نین امنا و مؤسیس هیأت عضوی، بازرسی، علمی و ادبی و هنری کمیته‌سینین مودیری، قورولتایلار دبیرخاناسینین مرکز عضوی.

۲-    خوی شهرینین آثار و مفاخر فرهنگی درنگینین عضوی. بوردا یئری گؤرورم اؤز میننتدارلیغیمی خویون اوزامانکی فرمانداری «رضازاده» جینابلاریندان بیلدیرمیش اولام.

۳-    خوی شهرینین همیاری، همکاری با مسئولین جمعیتی‌نین آموزش و پرورش کمیته‌سینین مسئولو. بوردادا یئرلی گؤرورم اؤز قلبی تشکورلریمی جناب «شکوری»، شهرمیزین حؤرمتلی ایمام جومعه‌سیندن بیلدیرمیش اولام.

۴-    یئرلی، ایالتی و منطقه‌ای و هابئله اؤیرنجی‌سل نشرییاتینا سورکلی قلم چالمیشام.

۵-    خوی ویلایتینین تورکجه کیلاسلارینی‌ داییر ائدیب و درس وئرمه شرفی ایلک دؤنه اولاراق منه قیسمت اولموش و بوگونه‌دک بئش دؤره تورکجه‌ده کیلاس قورماغا ناییل اولموشام؛ ایکی دؤره آذربایجان تورکجه‌سینین قرامئری باره‌ده (بیری خویون بسله‌ییش فاکولته‌سینده، بیری خویون فرهنگ و ایرشاد ایسلامی ایداره‌سینده یازیچیلار درنگینده)؛ ایکی دؤره‌ آذربایجان دیل و ادبیات تاریخی ساحه‌سینده، و بیرد دؤره «یازیچیلیق اوصوللاری» باره‌ده خویون یازیچیلار درنگینده کیلاس قورماغا باشاریلی اولدوم. هابئله نئچه دؤره تهرانین امیرکبیر (پلی تکنیک) و تربیت مدرس بیلیم‌یوردلاریندا، مهندیس علیرضا صرافی جنابلارینین دعوتی اوزره چاغیریلمیش اؤیرتمن عونوانیله تورکجه کیلاسلاریندا تدریس ائتمیشم. یئری وار بوردا قلبی تشکورلریمی جناب صرافی‌دن بیلدیرمیش اولام.

۶-    تقاعودچولار اوجاغینین مدیر عامل و ناییب رئیسی.

۷-    فرهنگیلر آزاد مصرف تعاونی شرکتی‌نین تأسیس ائدن هیأت عضوی، هیأت مدیره‌سی‌نین رئیسی و عضوی.

–       بوگونه قدر آپاردیغینیز دانیشیقلاردان بویرون، یازیلارینیز هانسی درگی‌لر، هفته‌لیکلر و باشقا یئرلرده چاپ اولونوب؟

بوگونه قدر منله اولونموش موصاحیبه‌لری بئله ایضاحلانا بیلرم:

۱-    خوی هفته‌لیگی، «گفتگویی با استاد یکانی، نویسنده و محقق خویی» عونوانیله، دانیشیق آپاران خسرو کرمانشاهی جنابلاری، ۱۳۷۸جی ایلین مهر آییندا.

۲-    خوی اورین هفته‌لیگی، «درباره استاد پرویز یکانی، اندیشمندی اندیشه‌مند» عونوانیله، دانیشیق آپاران فریدون دهقانی جنابلاری، ۱۳۸۴جی ایل.

۳-    فردای ما هفته‌لیگی، «باخیشلار» عونوانیله، دانیشیق آپاران نبی‎اوغلو جنابلاری، ۱۳۸۴جو ایلین فروردین آیی.

۴-    مبین هفته‌لیگی (ویژه نامه جان آذربایجان۳)، دانیشیق آپاران مهندس علیرضا صرافی جنابلاری، ۱۳۷۸جی ایل.

۵-    یاشیل یول درگیسی، خوی پیام نور بیلیم‌یوردونون نشریه‌سی، «مصاحبه با بنیانگذار کلاسهای آموزش زبان و ادبیات ترکی در خوی» عونوانیله، دانیشیق آپاران قاسمی جنابلاری.

۶-    اؤیرنجی، امیرکبیر (پلی تکنیک تهران) بیلیم‌یوردونون درگیسی، «گفتگو با استاد پرویز یکانی زارع، مورخ و فولکلورشناس معاصر» عونوانیله، ۱۳۸۰جی ایل اردیبهشت آیی.

۷-    کیملیک، همدانین بوعلی سینا بیلیم‌یوردونون درگی‌سی.

۸-    پیام اورمیه هفته‌لیگی.

۹-    «باتی آذربایجان بیرینجی اؤیرتمنیله دانیشیق آپارما» عونوانیله، دانیشیق آپاران ارکین یئکه‌نلی.

۱۰-    خوی نگار درگیسی، «یئتمیش ایللیک عؤمرون اثری – اوستاد پرویز یکانی زارع‌ین ائلیمیزه باغیشلادیغی تحفه‌لره بیر باخیش» عونوانیله، دانیشیق آپاران عاباس نعیمی جنابلاری، ۱۳۹۲جی ایل ایسفند آیی.

–       یاراددیغینیز اثرلره گؤره دانیشاق. هانسی کیتابلارینیز چاپ اولوب، چاپا حاضیر اولانی وارمی، و بئله سوروشوم کی اثرلرینیز بوگون نه دورومدا؟

کیتابلاریمی تانیددیرماق ایسته‌سم، اونلاری نئچه بؤلومه بؤلمه‌لییه‌م:

۱-    چاپ اولونموش اثرلر:

–        آذربایجان شیفاهی ائل ادبیاتینا بیر باخیش؛ تهران، انتشارات فرزانه، ۱۳۷۷٫

–        معرفی شهرهایی از اذربایجان، تبریز، انتشارات اختر.

–        میرزا نورااله خان یکانی زارع از پس غبار زمان، اورمیه، نشر یاز.

–        میللت سرداری ستارخان و مشروطه نهضتی، اردبیل، نشر —، ۱۳۷۴٫

۲-    بیلیم‌یوردلاردا تدریس اوچون چاپ اولونان اثرلر: (بیلیم‌یوردلار، تربیت معلم مرکزلری، آموزش ضمن خدمت کیلاسلاری اوچون)

–        سیر دانشگاه در ایران (بو اثر آزاد ایسلامی بیلیم‌یوردلار ایچینده ممتاز رتبه‌سین اله گتیریب)

–        آذربایجان تورکجه‌سینین قرامری (درسلیک)

–        آذربایجان دیل و ادبیات تاریخی (درسلیک)

–        بررسی دروس جغرافیایی دوره ابتدایی (درسلیک)

–        بررسی دروس تاریخ دوره ابتدایی (درسلیک)

–        بررسی دروس تعلیمات اجتماعی دوره ابتدایی (درسلیک)

–        زبان آموزی (درسلیک)

–        سرودهای خاص کودکان (درسلیک)

–        کارهای دستی و مهارتهای فنی (درسلیک)

–        کار و آشنیی با طبیعت و زندگی اجتماعی (درسلیک)

–        روشهای تدریس (درسلیک)

–        مسائل نوجوانان و روشهای هدایت رفتاری (درسلیک)

–        کاربرد مواد آموزشی (درسلیک)

–        آئین نگارش (درسلیک)

–        مکاتبات اداری (درسلیک)

–        روشهای مطالعه و تحقیق (درسلیک)

–        خوی‌شناسی؛ بو اثرین نئچه بؤلومو خوی هفته‌لیین ۱۰ ساییسیندا چاپ اولونوبدور

–        آذربایجان آغیز ادبیاتی؛ بو اثرین نئچه بؤلومو خوی هفته‌لیین بیر نئچه ساییسیندا چاپ اولوبدور.

۳-    چاپ اولونمامیش و یاییلمامیش اثرلر:

–        آذربایجان داستانلارینین اؤزه‌للیکلری (آذربایجان داستانلاری سجیه‌لر باخیمیندان)

–        اعلامنامه ترکان (۴ جیلدده)

–        مشاهیر و نام‌آوران خوی (۳ جیلدده)

–        سؤزلوک (۳۴ دفترده)

–        دده قورقود بویلاری و بویلارین آراشدیرماسی

–        رابطه شاگرد و معلمی

–        آذربایجان ماهنیلار و نغمه‌لری

–        تاریخ و جغرافیای آذربایجان از پیش از تاریخ تا دوره معاصر (۴ جیلدده)

–        نگاهی به آموزش و پرورش ایران، با رویکردی بر آموزش و پرورش شهرستان خوی

–        تاریخچه سوادآموزی در ایران

–        زندگی و آثار و تربت عارف بزرگ شمس تبریزی (قونیه یا خوی)

–        قوچلار و داش آسلانلار

–        خاطرات من از دوران سپاه دانشی من

–        بصیرتهای پراکنده

–        یازیشما یازینی

–        مقدمه‌ای بر نهضت حروفیه

–        عشق و حماسه در ادبیات شفاهی آذربایجان

–        مجموعه داستانهای تربیتی و پرورشی

–        مقدمه‌ای بر زرتشت و اوستا

–        مقدمه‌ای بر کتاب «امیر تیمور» نوشته گئرمان وامبری (جناب علیرضا مقدم ایسته‌یی اساسیندا)

–        مجموعه مقالات (۵ جیلدده)

–        بابک تاریخ گؤزگوسونده (درسهایی از فراسوی تاریخ)

–        ترکان از پگاه تاریخ تا دوره معاصر

–        آذربایجان اوشاق اویونلاری

۴-    ترجومه و کؤچورمه‌لر:

–        تاریخ آذربایجان، اسماعیل عالی‌اوغلو، باکی، ۱۹۹۱م

–        قدیم ناخچیوان، ولی علییوف، باکی، ۱۹۷۹م

–        آرازام کوره بندم

–        آذربایجان بدیعی صنعتکارلیغی دونیا موزئی‌لرینده

–        بوزقوردلار، نیهال آتسیز، باکی، ۱۹۹۳م

–        قوتادقوبیلیک، یوسف خاص حاجب، آنکارا، ۲۰۰۰م

–        آذربایجان اوشاق فولکورو و کیتابخاناسی

–        آراز گولور

–        مراسیم‌لر، عادتلر، آلقیشلار

–        آذربایجان خالق یازینی اؤرنکلری، اهلیمان آخوندوف، آنکارا، ۱۹۹۴م

–        اسکی تورک یازیتلاری، حسین نامیق اورخون، آنکارا، ۱۹۹۴م.

۵-    فولکلور ساحه‌سینه آیید اثرلر:

–        آتالار سؤزو (۲جیلدده- دوققوزمیندن آرتیق آتاسؤزلری)

–        بایاتیلار (۲جیلدده- آلتی‌میندن آرتیق بایاتی)

–        «ایش-امک» و «اینام» نغمه‌لری

–        لایلالار

–        نازلامالار و اوخشامالار

–        قوشماجالار (متل‌لر)

–        آلقیشلار و قارقیشلار

–        آشیق صنعتی

–        سینامالار و سانامالار

–        اوشاق فولکلورو

–        تاپماجالار

–        آذربایجان اوشاق اویونلاری.

۶-    مقاله‌لر: مقاله‌لرین سایی ۱۷۰ موریددن آرتیق اولموش و بونلارین چوخو ایالت، بؤلگه و اؤلکه نشریاتیندا، آغیرلامالاردا، قورولتایلاردا، کونفرانسلار، توپلانتیلار و میتینگلرده چیخیش ائدیلمیشدیر. چیخیشلارین چوخو آشاغیدا آدلاری گلن یئرلرده اولونوب: اورمیه و خویون مجتمع فرهنگی ارشاد و فرهنگ اسلامی‌سی، اورمیه و تبریزین تالار اجتماعات کاخ جوانانی، تهرانین تالار شفقی، تهرانین تربیت مدرس و امیرکبیر بیلم‌یوردلاری، اورمیه‌نین بیلیم‌یوردو و دامپزشکی‌سی، آذربایجانی‌های مقیم تهران مسجیدی و… هابئله ایشیق، اؤیره‌نجی، چیچک، ایلدیریم، آفرینش، هفته‌نامه خوی، اورین، امید زنجان، نوید آذربایجان، فردای ما، صبح صادق خوی و… درگی‌لرینده چاپ اولونولدولار.

–       کیتابلارینیزین چاپ اولونماماسینین سببی نه اولا بیلر؟

تأسوفلر اولسون کی چتینلیکلرین ان باشیندا مجوز وئریلمه‌مه‌سی یئر توتور؛ ایکینجی چتینلیک مالی ایمکانیم اولماماسی‌دیر.

–       سیز بیر یازار اولاراق ایسته‌یینیز اوخوجودان نه‌دیر؟

یاشاماق یانماق‌دیر، یاناسان گرک — حیاتین معناسی یالنیز اوندادیر

شمع اگر یانماسا یاشامیر دئمک — اونون یاشاماسی یانماقدادیر

اولوسوموزن اؤز میللی کولتور و وارلیغینا باغلی قالیب، عشق بسله‌مه‌سی و اولدوقجا بو کولتور و مدنیتی باجاریق و شرفله قوروماسی یازاری توکنمز ماراقلا قلم وورماغا و یارادیجیلیغا یؤنلدیر و بو یارادیجیلیقلار وارلیق و کیملیک رمزینه چئویریلیر.

اوخوجولارین یازارلا سیخ باغلیلیق و ایلگیلی اولما اثرینده، ایسته‌دیکلری زمینه‌لری یازارا عکس ائتدیرمه‌سی و یازارین یازدیقلارینا قیمت قویولماسی.

–       واردیلار بیر سیرالاری کی یازار اولماق ایسته‌ییرلر، بونلارلا سؤزونوز ندیر؛ نئجه بیر یاخشی یازار اولسونلار؟

یازار، یئرلی مطبوعاتی، اورانین کولتور گؤزگوسو ساناراق، تدقیقی و باجاریقلی ایشلر گؤرمه‌یی گره‌کیر. بیر یازار کوتله‌لرین فیکرین آچمادا و توپلومدا اولان ایستکلره جاواب وئرمه‌ده، اؤز اولوسونون و خالقی ایزله‌دیکری آماجلاری بیلمه‌لیدیر. یازار گرک اؤز روحوندان فایدالانارکن طبیعتی جانلاندیریب و طبیعتی آرتیق ماراق دوغوردان قلمه آلسین و «هوگو» دئمیش کیمی خالقی‌نین اؤتن گونلرینی آراییب-آختارمیش اولسون. یازار اؤزو آرتیق یؤنلو چالیشمالاریله، گؤزل اینجه‌لیکلرینی تانیتدیراراق آتا-بابالاریمیزدان قالان میراثی داها اینجه‌لییب گنج نسلیمیزین الینه چاتدیرمالیدیر.

یازار گرک تام وارلیغی ایله قبول ائتسین کی:

عشقی بؤیوکلرین دردی‌ده بؤیوک  — دردلری اریدن ایگید ار گره‌ک

اثرلر کولتور گؤزگوسو اولمادادیر، یازارلاریمیز بونو قبول ائدیب و اؤزونه اینانماسی یقین کی اینکارسیز رولو اولا بیلر.

-گنج‌لریمیزه صوحبتیز وارمی؟

بو نغمه‌نی یازیبلار حکیمانه داشلارا — کیم عاشیق اولماسا چاتا بیلمز کمال اونا

عشق اهلیدیر جهاندا چاتان تکجه عزته — فرق ائیلمزکی بوذر و سلمان، بلال اونا

اساس یازیچیلیق ایشی آغیر و مسئولیتلی بیر ایش اولاراق آرتیق چوخ ائنیش-یوققوشلو و چتین بیر ایشدیر، اؤزه‌للیکله یازدیقلاری تؤرکجه اولارسا بو چتینلیکلر داهادا حدودسوز و تورلو تورلو آغیرلیقلارلا قارشی‌لانیر.

هر بیر یازاری کمالا چاتدیران، بوتون قلم یولداشلاری، قهرمان فیکیرداشلاری، دوشونجه و دویغو اوزاییندا هرآن اینسانلیق یوکسه‌لیشی اوچون چالیشان و ایشیقلی صاباحی گؤره‌ن کیمسه‌لر، خوصوصیله گنج نسیل اولا بیلر.

گنج نسیل بو اوزدن کی مودام گئنیش فورمادا ایجتیماعی شبکه‌لرله ایلگیده‌دیر، یازارین هم یازدیقلارینین گؤزگوسو، هم تنقیدچیسی و یول گؤستره‌نی عینی حالدا دوشونجه‌لرینین یایانی دیر.

منجه اولوسال و کولتورل بیر ایش، عینی اکینجی ایشینه اوخشاییر، بوگون توخومون اکیر، سونرا ایللر اوزونو تاخیل گؤتورور. بئله‌ایسه بیر یازار گرک بوتون آیدینلار اؤزه‌للیکله گنجلردن سوره‌کلی اولاراق کولتورل و سوسیال اثرلرین اوخوماغین، آنالیز ائدیب نظر وئرمه‌لرین و بو ایشده هئچ ندن اسیرگه‌مه‌کلرین ایسته‌سین. نییه کی بئله‌نچی ایشلر یازار اوچون ان اؤنملی یاردیم و یول گؤستریکلی اولا بیلر؛ بو داها آرتیق دیل و ادبیاتیمیزین چیچکلنمه‌سینه سبب اولا بیلر.

–       سون سؤزونوز:

من بیر یازار اولاراق، ایرانلی، آذربایجانلی و تورک سویلو اولدوغوما فخر ائدیرم و اؤیره‌تمه‌نلیگی ان شرفلی و اوستون بیر ایش سانیرام. سون اولاراق منه نیسبت گؤستردیگینیز سئوگی و محبتدن آچیق اوره‌کله مینتدارلیق ائدیب و سیز عزیزلریم سالار بی و پیام بیه اولدوغوندان آرتیق اوغورلار و باشاریلار دیله‌ییرم.

مصاحیبه کئچیرنلر: سالار کرلو -پیام علم قلیلو

گؤرونتولر( شکیل) : پیام علم قلیلو

سسی متن چئویرن : پیام علم قلیلو

باشقا یاردیملار : مصطفی جباری

مصاحیبه نین تاریخی : ۱۳۹۳/۰۳/۰۲

468 ad

یک نظر بدهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

خوی کیدز سیز ایله بیرلیکده
خوی کیــــــــــدز همراه شما

Social Media Auto Publish Powered By : XYZScripts.com